اسلام آباد: وزیراعظم شہباز شریف کا کہنا ہےکہ جنگ بندی کے لیے امریکی صدر ٹرمپ کے اہم کردار کو سراہتے ہیں، صدر ٹرمپ نے ثابت کیا کہ وہ امن کے پیامبر ہیں۔

امریکی سفارت خانے میں تقریب سے خطاب کرتے ہوئے وزیراعظم شہباز شریف کا کہنا تھا کہ کوئی شک نہیں رہا کہ پہلگام واقعہ بھارت کا فالس فلیگ آپریشن تھا، پاکستان نے کشیدہ صورتحال میں بھی بہت تحمل کا مظاہرہ کیا،  امریکی صدر ٹرمپ سرد اور گرم جنگ کے خلاف ہیں،  جنگ بندی کے لیے صدر ٹرمپ کے اہم کردار کو سراہتے ہیں۔

وزیراعظم شہباز شریف کا کہنا تھا کہ صدر ٹرمپ نے ثابت کیا کہ وہ امن کے پیامبر ہیں، امن کے فروغ، اقتصادی روابط میں اضافےکے لیے صدرٹرمپ کی کوشش قابل ستائش ہے،  پاک بھارت کشیدگی میں کمی اور جنگ بندی کے لیے دوست ملکوں کے بھی شکر گزار ہیں۔

وزیراعظم کا کہنا تھا کہ پاکستان اور بھارت کے درمیان جنگ بندی پر عمل ہو رہا ہے ، نائن الیون کےبعد دہشت گردی کے خلاف عالمی جنگ شروع ہوئی، 2018 میں پاکستان نے دہشت گردی کا مکمل خاتمہ کردیا تھا، دہشت گردی کے خلاف جنگ میں پاکستان نے بھاری جانی مالی نقصان اٹھایا،90 ہزار سے زائد شہادتیں اور 150 ارب ڈالر  سے زائدکا معاشی نقصان ہوا، انسداد دہشت گردی کے لیے پاکستان کی قربانیاں کسی سےکم نہیں۔

ان کا کہنا تھا کہ پہلگام واقعے پر بھارت کو غیرجانبدارانہ عالمی انکوائری کی پیشکش کی، ہماری مخلصانہ پیشکش کے جواب میں بھارت نے پاکستان پر حملہ کیا، بھارت نے حملے کرکے پاکستان میں خواتین اور بچوں کو بھی نشانہ بنایا، پاکستان نے اپنے دفاع میں بھارت کے 6 جہاز مارگرائے، پاکستان ہمیشہ خطے میں امن استحکام اور خوشحالی کا خواہشمند رہا ہے۔

وزیراعظم کا مزید کہنا تھا کہ  ہماری توجہ معیشت کو مضبوط بنانے پر ہے، امریکا کے ساتھ اقتصادی تعلقات بڑھانےکے لیے اقدامات جاری ہیں، ٹیرف کے مسئلے سمیت تجارت میں اضافے کے لیے اقدامات جاری ہیں،  پاکستان اور  امریکا کے تعلقات نئے دور میں داخل ہو رہے ہیں، پاک امریکا تعلقات مضبوط بنانے کے لیے پرعزم ہیں،  دونوں ملک جمہوری روایات اور آئین کی بالادستی پر یقین رکھتے ہیں۔

چئیرمین پاکستان پیپلز پارٹی بلاول بھٹو زرداری نے کہا ہے کہ جنوبی ایشیا میں دیرپا امن کی واحد ضمانت مسئلہ کشمیر کا منصفانہ حل ہے۔

بلاول بھٹو نے یہ بات نیویارک کے کارنیل کلب میں اوورسیز پاکستانی سوسائٹی اور امریکا میں زیر تعلیم طلبہ و طالبات کے اجتماع سے خطاب میں کہی۔

پاکستانی وفد کی واشنگٹن روانگی سے پہلے نیویارک شہر میں اس عوامی تقریب کا اہتمام امریکن پاکستانی کمیونٹی سے تعلق رکھنے والے غلام اللہ شہزاد اور عمران اگرا نے کیا تھا۔

تقریب میں پاکستان کے 9 رکنی وفد میں شامل شیری رحمان، حناربانی کھر، جلیل عباس جیلانی، مصدق ملک، خرم دستگیر خان، فیصل سبزواری، بشری انجم بٹ اور تہمینہ جنجوعہ نے بھی شرکت کی جبکہ امریکا میں پاکستان کے سفیر رضوان سعید شیخ نے بھی اس موقع پر خطاب کیا۔

بلاول بھٹو نے کہا کہ بیرون ملک زیر تعلیم ہونہار پاکستانی طلبہ و طالبات ہمارا روشن مستقبل ہیں، وہ ہر شعبے میں وطن کا نام پیدا کریں۔

بلاول بھٹو نے پاکستانی سوسائٹی اور طلبہ کو بھارت کی کھلی جارحیت سے آگاہ کیا اور انہیں بتایا کہ بھارت پانی کو ہتھیار کےطورپراستعمال کررہا ہے جبکہ جنگ کے دوران اس نے عام شہریوں اور شہری انفراسٹرکچر کو نقصان پہنچایا۔ یہ بھی کہا کہ کس طرح افواج پاکستان نے دندان شکن جواب دے کر بھارت کو چاروں شانے چت کیا۔

بلاول بھٹو نے کہا کہ بھارت کی جانب سے سندھ طاس معاہدے کی یکطرفہ معطلی عالمی قانون کی صریحاً خلاف ورزی ہے جو کسی صورت برداشت نہیں کی جاسکتی۔

سابق وزیر خارجہ اور پاکستانی وفد کے سربراہ کا کہنا تھا کہ امن، تحمل اور ڈائیلاگ ہی آگے بڑھنے کا واحد رستہ ہے اور یہ بھی واضح کیا کہ جنوب ایشیا میں دیرپا امن کی واحد ضمانت مسئلہ کشمیر کا حل ہے۔

تقریب سے خطاب میں شیری رحمان اور دیگر نے کہا کہ پاکستان امن چاہتا ہے مگر عزت اور توقیر پر کسی صورت سمجھوتا نہیں کرے گا۔

نیویارک میں پاکستان کے کمیونٹی رہنما عمران اگرا نے کہا کہ وفد کی پاکستانی کمیونٹی سے ملاقات نے لوگوں کو وفد کے دورے کی اہمیت کو سمجھنے میں مدد دی اور امید ظاہر کی کہ امریکن پاکستانی بھی اس موقف کی مضبوط آواز بنیں گے۔

اسلام آباد میں امریکا کے یوم آزادی کی تقریب سے خطاب میں امریکی ناظم الامور نیٹلی بیکر نے وزیراعظم شہبازشریف اور فیلڈ مارشل عاصم منیر کی قیادت کو قابل تحسین قرار دیا ہے۔

ناظم الامور نیٹلی بیکر نے یوم آزادی کی تقریب میں شرکت پر وزیراعظم کا شکریہ ادا کیا۔

ان کا کہنا تھا کہ امریکا اور پاکستان نے ہر اچھے برے وقت میں شانہ بشانہ کام کیا، پاکستان میں تعلیم، صحت، خوراک اور زراعت کے شعبوں میں اہم امریکی تعاون رہا، داعش حملہ آور کی حوالگی انسداد دہشت گردی میں بڑی کامیابی ہے، وزیراعظم شہباز شریف اور فیلڈ مارشل عاصم منیر کی قیادت قابل تحسین ہے۔

نیٹلی بیکر کا کہنا تھا کہ پاک امریکا سکیورٹی تعاون طویل المدت شراکت داری کا ستون ہے، ڈیجیٹل معیشت اور اختراعی سرمایہ کاری میں پاکستان کا کردار متاثرکن ہے، پاک بھارت جنگ بندی میں امریکا نے مؤثر سفارتی کردار ادا کیا، یو ایس ایڈ نے پاکستان میں ترقیاتی منصوبوں کے ذریعےلاکھوں زندگیوں کو بدلا، امریکا پاکستان کو ٹیکنالوجی،سرمایہ کاری اور مواقع فراہم کرتا رہےگا، پاک امریکا شراکت داری کا اگلا باب استحکام اورخوشحالی پرمبنی ہوگا۔

امریکی ناظم الامور کا کہنا تھا کہ میں ذاتی طورپرکرپٹوکرنسی اور ڈیجیٹل مارکیٹوں میں ہماری مشترکہ سرمایہ کاری پر بہت خوش ہوں۔ اختراع،ٹیکنالوجی اور ڈیجیٹل اسپیس میں نئی راہیں ہموار کرنے میں پاکستان کے قائدانہ کردار کی معترف ہوں۔