برطانیہ نے اسرائیل کے ساتھ تجارتی مذاکرات معطل کر دیے۔

برطانیہ کے وزیر خارجہ ڈیوڈ لیمی نے غزہ کی ناکا بندی کو ‘اخلاقی طور پر غلط’ اور ‘غیر معقول’ قرار دیا اور پارلیمنٹ کو بتایا کہ اسرائیلی حکومت کے ‘قابل مذمت اقدامات اور بیان بازی’ ملک کو اپنے دوستوں اور شراکت داروں سے الگ تھلگ کر رہی ہے۔

 ڈیوڈ لیمی نے کہا کہ اسرائیلی سفیر کو تجارتی مذاکرات معطلی سے آگاہ کرنے کیلئے طلب کیا ہے۔

اس دوران برطانوی ارکان پارلیمنٹ نے استفسار کیا کہ اگر اسرائیل باز نہ آیا تو سرخ لکیر کیا ہے؟جب عالمی برادری نے کہا کہ وہ اسرائیل کو روک دے گی اور ایسا نہیں ہوا، غزہ کا وقت ختم ہو گیا ہے۔ یہ بھی پڑھیں

جواب میں ڈیوڈ لیمی نے کہا کہ یہ واضح کردوں کہ حکومت امداد کیلئے اسرائیل کے ماڈل کی مخالفت کرتی ہے، ہم سمجھتے ہیں کہ یہ انسانی اصولوں کا احترام نہیں کرتا، یہ مطلوبہ رفتار یا پیمانے پر مؤثر طریقے سے امداد نہیں پہنچا سکتا یہ غلط ہے، اور یہ انسانی نظام کیلئے خطرناک ہے۔

ان کا کہنا تھاکہ اسرائیل نے تجویز پیش کی ہے کہ وہ غزہ کے اندر امداد کی تقسیم کا انتظام کرے گا، اقوام متحدہ کی ایجنسیوں اور رضاکار تنظیموں کے کردار کو ختم کرے گا۔

ڈیوڈ لیمی کا کہنا تھاکہ غزہ میں لاکھوں شہریوں پر بھوک کا خطرہ منڈلا رہا ہے جوکہ مکروہ عمل ہے، غزہ میں 11 ہفتوں سے انسانی امداد کی ناکہ بندی ظالمانہ ہے، اسرائیلی وزیراعظم نیتن یاہو اب یہ سب ختم کریں، اسرائیل کا امداد روکنا اورشراکت داروں کے خدشات کو مسترد کرنا ناقابل دفاع ہے۔

دوسری جانب اسرائیلی فوج نے 2 مارچ سے غزہ کی ناکا بندی کر رکھی ہے اور اقوام متحدہ نے خبردار کر دیا کہ امداد نہ پہنچی تو اگلے 48 گھنٹوں میں 14 ہزار فلسطینی بچے مر سکتے ہیں۔

اقوام متحدہ حکام کے مطابق گزشتہ روز پانچ امدادی ٹرک غزہ میں پہنچے لیکن اسرائیلی فوج نے امداد تقسیم نہ ہونے دی، وہیں اسرائیل کے غزہ پر وحشیانہ حملے جاری ہیں اور  صبح سے اب تک مزید 73 فلسطینی شہید ہوگئے۔

خیال رہے کہ غزہ میں نئے فوجی آپریشن پر کینیڈا، فرانس اور برطانیہ نے اسرائیل کے خلاف ٹھوس اقدامات اور پابندیاں عائد کرنے کی دھمکی دے رکھی ہے۔

اسرائیل نے تقریباً 3 ماہ کی مکمل ناکہ بندی کے بعد کرم ابو سالم کراسنگ کے ذریعے بمشکل سے پانچ امدادی ٹرکوں کو غزہ میں داخل ہونے کی اجازت دی ہے۔ یہ ٹرکوں میں بچوں کی خوراک ، ادیات اور دیگر بنیادی اشیاء شامل ہیں۔ یہ اقدام بین الاقوامی دباؤ خاص طور پر برطانیہ، فرانس اور کینیڈا کی جانب سے اسرائیل پر پابندیاں لگانے کی دھمکیوں کے بعد اٹھایا گیا۔

ایک رپورٹ کے مطابق غزہ کی 2.1 ملین آبادی میں سے تقریباً 5 لاکھ افراد قحط کے دہانے پر ہیں جبکہ 71 ہزار بچے شدید غذائی قلت کا شکار ہیں۔ اقوام متحدہ نے خبردار کیا ہے کہ اگر غزہ میں امداد کی اجازت نہ دی گئی تو 48 گھنٹوں کے اندر اندر مزید 14 ہزار بچوں کی اموات کا خدشہ ہے۔

اسرائیل کے ان تینوں اتحادی ممالک نے اسرائیل کی غزہ اور مقبوضہ مغربی کنارے میں سرگرمیوں کے خلاف ٹھوس اقدامات اور ممکنہ پابندیوں کی دھمکی دیتے ہوئے کہا کہ اسرائیل غزہ میں اپنی نئی "شرم ناک” فوجی کارروائیاں بند کرے۔ اس بیان پر رد عمل دیتے ہوئے اسرائیلی وزیر اعظم نیتن یاہو نے کہا کہ یہ مشترکہ بیان سات اکتوبر کو اسرائیل پر ہونے والے حملے کے لیے "بڑے انعام” کے مترادف ہے۔

دوسری جانب اقوام متحدہ اور انسانی حقوق کی تنظیموں نے بھی اسرائیل پر الزام عائد کیا ہے کہ وہ بھوک کو جنگی ہتھیار کے طور پر استعمال کر رہا ہے جو بین الاقوامی قانون کی خلاف ورزی ہے۔ اقوام متحدہ کے امدادی سربراہ نے اسرائیل کی جانب سے محدود امداد کی اجازت کو "ضرورت کے سمندر میں ایک قطرہ” قرار دیا ہے۔ مزید برآں 22 ممالک نے ایک مشترکہ بیان میں اسرائیل سے مطالبہ کیا ہے کہ وہ غزہ میں مکمل امداد کی فراہمی بحال کرے اور امدادی تنظیموں کو آزادانہ طور پر کام کرنے دے۔