مکہ مکرمہ: حجاج کرام منیٰ پہنچ گئے، اللہ کے مہمان یہاں رات بھر قیام کریں گے، کل تمام حجاج میدان عرفات کیلئے روانہ ہوں گے۔
تفصیلات کے مطابق کل تمام حجاج میدان عرفات کیلئے روانہ ہونگے جبکہ آج عازمین منیٰ پہنچ چکے ہیں، حجاج کرام کا کہنا ہے کہ خیمہ بستی کی رہائش پر ہی کھانا فراہم کیا جارہا ہے، ہم حکومت پاکستان کے شکر گزار ہیں، شاندار انتظامات کیے گئے ہیں۔
سعودی عرب میں حج 2025 کے سلسلے میں حاجیوں کو بہترین سہولیات فراہم کرنے کے لئے اقدامات کیے گئے ہیں، اللہ کے مہمانوں کی خاطرداری کے لیے خصوصی منصوبہ بندی کی گئی ہے۔
عرب خبر رساں ادارے کی رپورٹ کے مطابق حج 2025 کے دوران حاجیوں کی صحت کو مقدم رکھتے ہوئے وزارتِ حج و عمرہ نے متوقع شدید گرمی اور لُو کے پیش نظر خاص انتظامات کیے ہیں۔
اس حوالے سے ‘حج آگاہی مرکز’ کے تعاون سے ایک مہم شروع کی گئی ہے، جس میں حجاج کرام کو سورج کی تپش اور گرمی سے بچاؤ کے حوالے سے معلومات فراہم کرنے کا سلسلہ جاری ہے۔
رپورٹس کے مطابق وزارت نے ایک حفاظتی کتابچہ بھی شائع کیا ہے جس میں تین اہم حفاظتی اقدامات تجویز کیے گئے ہیں۔
حجام کرام کو ہدایت کی گئی ہے غیرضروری طور پر دن کے وقت باہر نہ نکلیں، اگر بہت ضروری ہو تو سر کو ڈھانپ کر رکھیں یا چھتری کے سائے میں رہیں، پانی کا استعمال زیادہ رکھیں اور پسینہ بہنے سے روکیں، سایہ دار مقامات پر زیادہ قیام کریں، دھوپ سے جتنا ہوسکے اپنے آپ کو بچائیں۔
علاوہ ازیں یہ ہدایت بھی کی گئی ہے پُرسکون رہیں اور شدید گرمی میں جلد بازی سے گریز کریں جبکہ سخت جسمانی کام نہ کرنے کی بھی ہدایت کی گئی ہے۔
حج ایام کے دوران ایک گھنٹے میں 1 لاکھ 7 ہزار حجاج طواف کعبہ کر سکیں گے
مسجد الحرام میں توسیع کے بعد اب رواں سال حج ایام میں ایک گھنٹے میں ایک لاکھ 7 ہزار حجاج خانہ کعبہ کا طواف کر سکیں گے۔
عرب میڈیا کے مطابق سعودی وزارت حج وعمرہ نے رواں برس حج سیزن میں عازمین حج کی سہولت کے لیے تمام اقدامات کر لیے ہیں حرم مکی کی گنجائش میں اضافے کے بعد رواں سیزن میں حج ایام کے دوران ایک گھنٹے میں بیک وقت ایک لاکھ سات ہزار حجاج خانہ کعبہ کا طواف کر سکیں گے۔
انتظامیہ کی جانب سے براہ راست صحن مطاف کو جانے والے مسجد الحرام کے مرکزی اور ذیلی دروازوں کو بھی مخصوص کیا ہے، تاکہ حجاج کو کسی قسم کی دشواری کا سامنا نہ کرنا پڑے اور وہ براہ راست مطاف میں پہنچ سکیں۔
ادارہ امور حرمین نے ایامِ حج میں بلخصوص ازدحام کو کنٹرول کرنے کےلیے بھی جامع حکمت عملی مرتب کی ہے۔کراؤڈ کنٹرولنگ یونٹس کی جانب سے مقررہ منصوبے کے مطابق عمل کیا جائے گا۔
مسجد الحرام میں اژدھام کو کنٹرول کرنے کے لیے مسجد الحرام میں آمدورفت کے لیے جدا راستوں کو مخصوص کیا گیا ہے جس کا مقصد مسجد الحرام میں داخل ہونے اور باہر نکلنے والوں کے راستوں کو آمدورفت کے لیے رواں رکھنا ہے۔
ادارے کی جانب سے کراؤڈ کنٹرولنگ کی ٹیمیں مختلف مقامات پرتعینات اور کنٹرول روم سے مسلسل رابطے میں ہوں گی تاکہ حجاج کرام کے ہجوم کو مذکورہ مقامات سے دوسری جانب منتقل کرنے کے لیے ان کی رہنمائی کی جا سکے۔
