پاک بھارت کشیدگی اور بھارتی جنگی جارحیت پر پاکستان کے موقف سے آگاہ کرنے کے لیے اراکین پارلیمان کی کمیٹی 30 مئی سے غیر ملکی دورے شروع کرے گی۔
اے آر وائی نیوز کو ذرائع سے ملنے والی اطلاعات کے مطابق حالیہ بھارتی جنگی جارحیت اور پاک بھارت کشیدگی کے حوالے سے پاکستانی موقف سے دنیا کو آگاہ کرنے کے لیے اراکین پارلیمان کی کمیٹی 30 مئی سے غیر ملکی دوروں کا آغاز کر رہی ہے۔
ذرائع نے بتایا کہ پی پی چیئرمین اور سابق وزیر خارجہ بلاول بھٹو 30 مئی کو سرکاری دورے پر امریکا پہنچیں گے اور 2 جون سے امریکی حکام سے ملاقاتوں کا آغاز ہوگا۔
بلاول بھٹو کی سربراہی میں کمیٹی امریکی حکام سے ملاقاتیں کرے گی۔ امریکی حکام کو پاک بھارت کشیدگی پر پاکستانی موقف پر بریفنگ دی جائے گی۔ اس کے علاوہ کمیٹی امریکی حکام کو بھارت کی ڈس انفارمیشن، فارن انفلووینسڈ آپریشن سے بھی آگاہ کرے گی۔
پارلیمانی کمیٹی 9 جون تک امریکا میں قیام کرے گی اور وہاں سے برطانیہ کے لیے روانہ ہوگی۔ برطانیہ کے بعد یہ پارلیمانی کمیٹی یورپی ممالک کے دورے بھی کرے گی۔
واضح رہے کہ وزیراعظم شہباز شریف نے گزشتہ دنوں بھارتی پروپیگنڈے اور اس کی مذموم سازشیں عالمی سطح پر بے نقاب کرنے کے لیے بلاول بھٹو زرداری کی قیادت میں ایک سفارتی وفد بھیجنے کا فیصلہ کیا تھا۔
