بیجنگ: چین نے ایک بار پھر ٹیکنالوجی کے میدان میں برتری ثابت کر دی، اور کسی بحری بیڑے کی طرح ایسا ڈرون بردار (مدر شپ) بنا لیا ہے جو 100 خود کش ڈرون لے جا سکتا ہے۔
غیر ملکی میڈیا رپورٹس کے مطابق ٹیکنالوجی کی دنیا میں چین نے جدید ترین ’ڈرون کیریئر‘ تیار کر کے ایک اور سنگِ میل عبور کر لیا ہے، یہ ’ڈرون کیریئر‘ 100 خودکش ڈرونز لے جانے کی صلاحیت کا حامل ہے۔
’ڈرون بردار‘ ڈرون طیارہ ’جیو تیان‘ رواں برس جون کے آخر میں اپنے پہلے مشن پر جانے کے لیے تیار ہوگا، یہ جیٹ انجن سے چلنے والا اور طویل فاصلے تک پرواز کرنے والا بغیر پائلٹ طیارہ ہے جو 15 ہزار میٹر کی بلندی پر اڑنے اور 7 ہزار کلو میٹر تک فاصلہ طے کرنے کی صلاحیت رکھتا ہے۔
یہ ڈرون 16 ٹن تک وزن کے ساتھ پرواز کر سکتا ہے اور 6 ٹن تک ہتھیار اور چھوٹے خود کش ڈرونز لے جانے کی صلاحیت کا بھی حامل ہے۔ ’جیو تیان‘ سے اس کے اندر موجود 100 چھوٹے ڈرونز یا ہتھیار لانچ کیے جا سکتے ہیں جو دشمن کے دفاعی نظام کو متاثر کرنے کے لیے استعمال کیے جا سکتے ہیں۔
’جیو تیان‘ میں 8 ہارڈ پوائنٹس موجود ہیں، جن پر مختلف قسم کے ہتھیار اور سینسر نصب کیے جا سکتے ہیں۔
یہ ڈرون انٹیلیجنس، نگرانی، جاسوسی، الیکٹرانک وار فیئر، ہنگامی امداد، سرحدی و ساحلی دفاع، سمندری نگرانی، اور قیمتی زمینی وسائل کے تحفظ جیسے مقاصد کے لیے استعمال کیا جا سکتا ہے۔
